नवनिर्वाचित परिसंघ पदाधिकारी र प्रधानमन्त्रीबीच छलफल, अर्थतन्त्रलाई औद्योगिकरणमा लैजानुपर्नेमा जोड
काठमाडौं । प्रधानमन्त्री केपी शर्मा ओली र नेपाल उद्योग परिसंघबीच छलफल भएको छ ।
परिसंघका नवनिर्वाचित अध्यक्ष वीरेन्द्रराज पाण्डे नेतृत्वको पदाधिकारीसँगको छलफलमा प्रधानमन्त्री ओलीले देशलाई उत्पादनको थलो बनाइ औद्योगीकरणमा लैजान आवश्यक रहेको बताए ।
सामान आयात गरी नाफा आर्जन गर्नेतर्फ भन्दा देशमै उत्पादन बढाइ निर्यात गर्नेतर्फ ध्यान दिनुपर्ने प्रधानमन्त्री ओलीले बताए ।
सरकारले कानुनी एवं नीतिगत सुधार गर्दै निजी क्षेत्रलाई प्रोत्साहन गर्न खोजिरहेको उनले बताए । भान्सामा प्रयोग हुने वस्तुदेखि अन्य वस्तु नेपाली होस् भन्ने आफ्नो चाहना रहेको उनको भनाइ छ । स्वदेशी वस्तु उत्पादन र प्रयोगले मात्रै आयात प्रतिस्थापन गर्न सक्ने प्रधानमन्त्रीले बताए ।
परिसंघका नवनिर्वाचित अध्यक्ष पाण्डेले सरकारसँगको सहकार्यमा आयात प्रतिस्थापन गर्ने उद्देश्यले ‘मेक इन नेपाल’ स्वदेशी अभियान सञ्चालन गरिरहेको बताए ।
उनले आगामी एक दशकमा परिसंघले मुलुकको अर्थतन्त्रको आकार १ खर्ब डलर र दोहोरो अंकको आर्थिक बृद्धि गराउने लक्ष्य राखेको र यसका लागि ८ क्षेत्रलाई केन्द्रमा राख्नुपर्ने प्रारम्भिक अध्ययनले देखाएको बताए । यसमा सरकारले कानुनी एवं नीतिगत सुधारलाई उच्च प्राथमिकतामा राख्ने विश्वास उनले लिएको बताए ।
यसैगरी परिसंघका नवनिर्वाचित पदाधिकारीले सभामुख देवराज घिमिरेसँग भेट गरी निजी क्षेत्रको लगानी प्रवर्द्धन गर्ने गरी कानुन ल्याउन आग्रह गरेको छ ।
परिसंघले उद्योग, वाणिज्य तथा आपूर्तीमन्त्री दामोदर भण्डारी, भौतिक पूर्वाधार तथा यातायातमन्त्री देवेन्द्र दाहाल, ऊर्जा, जलस्रोत तथा सिँचाइमन्त्री दीपक खड्का, सार्वजनिक लेखा समिति सभापति ऋषिकेश पोखरेलसँग छुट्टाछुट्टै भेट गरी अर्थतन्त्रको वर्तमान अवस्था, कानुनी एवं नीतिगत सुधार, बजेटको प्रभावकारी कार्यान्वयन लगायत विषयमा छलफल गरेको छ ।
